SEE_ intspeasti sïranta imankunsï axanaka jorhemperichani _Preescolar_ arhikateri anchikuarhini

Nota traducida a Purépecha 

* Menki jauenaxakasï anchikuarhini jimpoka uetarhenchajka axauani jorhemperichani, jini enki kurhajkuarhianakasï

Morelia, Michoacán, 8 de noviembre del 2022.- Secretaría de Educación del Estado (SEE) arhikata, menki jauenaxati anchikuarhini, axauani jorhemperichani anchikuarhini jini enki uetarhenchanakasï, jimposï intsïnatisï sïrantechani tsïmankunsï uaka nirani jorhemperakuecharhu santarhu sapicheri _Preescolar_ arhikata.

Intsïnastisia anchikuarhikua ka atakuecha jorhempericha, ka orhejtsïkuasti ima anchikuarhikuechani _Unidad Estatal del Sistema para la Carrera de Maestros y Maestras (UESICAMM)_ arhikata, sesikua jinkoni, ka tatsekupani juramukuechani, menki jauenaxatisï intspeani sïrantechani imankunsï niuaka anchikuarhini jorhempericha enki ukasi ima ampe enki kurhajkumenakasï.

Kopikuarhu ima k'eri k'umanchikua uaxastakateri, _Secretaría de Educación_ arhikateri, enki jaka jima xanarhu _Siervo de la Nación_ arhikata, intsïnaxatisï tsa sïrantecha, iasï intsïnasti _50._

Pauani juramuticha menki jauenati intspeani sïrantechani, orhejtsïkuati ima juramuti _Educación Preescolar_ anapu, _Verónica Reyes García_ arhikata, enki uantaka enki, menki jauenani anchikuarhiaka jorhenkuarhirichankuni enki uenatikasi _normal_ arhikateri ma, enki ukasia iamintu ampe enki kurhajkumenakasi.

Kutsiruecha enki nitamakasia uexurikueri _2021_ intsïnasti anchikuarhikua _500_ jorhempericha, ka enki nitamanakasia ari uexurhikua jintestisi _900_ jorhempericha enki anchikuarhinakasia.

Isichkia _SEE_ anchikuarhisïnti axauani jorhemperichani, jini enki uetarhenchanakasï; ka itku p'imarhiasïnti jorhemperichani ka tatempechani sapicheri enki sesi erokauakasï, jimpoka maru jorhemperakuecharhu tsa _sindicatos_ arhikatecha p'inkuasïnti.